DÄNN & HÜT
D’Schwiiz isch modern, traditionell, anderscht und wunderschön. Im Monet September wömmer en chline Blick druf werfe, wie sich d’Schwiiz veränderet hät. Vo de reine Schwiiz, wo Usländer nid toleriert sind, zunere Schwiiz, wo Usländer ihre Platz gfunde händ und sogar Schrebergärtli eroberet. Doch so schön, wie s´isch, dass d’Schwiiz jetzt multikulti isch, so zeigt sich, dass d’Ängscht gegenüber de Usländer immer no vorhande sind. Euse Film „Schwiizermacher“ hät immer no nid a Aktualität verlore.
Und denn schafft´s d’Schwiiz ihri Bruchtümer z’zelebriere und Lüüt aller Nationalitäte i ihre Bann z’zieh. Bruchtümer und Sagene werdet wieterhin glebt, au wenn Usländer Schrebergärtli ignoh händ. Und das isch´s tolle dra.
Nische Schpezial am 13.09.15: „Winna – Weg der Seelen“ fiiret bi eus Winti-Premiere! Natürlich isch d’Regisseurin Fabienne Mathier bi eus uf Bsuech und beantwortet gern ali Frage vo eu a sie.
Programmation: Ivana Kvesic
So 06. September 2015 • 19:30 Uhr
Die Schweizermacher
D’Schwiizermacher isch en Film, wo d’schwiizer Iibürgerigspraxis uf d’Schippi nimmt. Usländer müend bewiise, dass sie schwiizerischer als d´Schwiizer sind. De Film isch entschtande im Nachgang zu de vier Schwarzebach-Initiative i de 70er Jahre (Initiative für de Schutz vo de Überfremdig – eigentlich analog zu de Abstimmig vom letschte Jahr). Schwiizermacher isch eine vo de beschtbsuechte schwiizer Film.
105 Min, OV, 35 mm
Regie: Rolf Lyssy
So 13. September 2015 • 19:30 Uhr
Winna - Weg der Seelen
Winna isch en Dokumentarfilm über s’urschprüngliche, mysteriöse und faszinierende Wallis, über Sagene und Myhtene über Seelewanderige und über Mensche, wo Verstorbene begegnet sind. De Film fangt die Sagene i, wo leider immer meh i Vergesseheit gratet. D’Zueschauer werdet mitgnah ad Gratzugnacht am Aletschgletscher und knüpfet Kontakt mit em Jensiits.
83 Min, OV (CH-D), digital
Regie: Fabienne Mathier (anwesend!)
So 20. September 2015 • 19:45 Uhr
Kampf der Königinnen
En wiitere wunderbare Dokumentarfilm über s’alljährliche Finale vo de Walliser Chüehkämpf jewiils im Mai. S’Publikum wird i dem schwarz-wiis Film in es Spektakel voller Spannige, Emotione, Liideschafte und fiine zwüschemenschliche Tön itauche. I dem Film prallt s’Neue und s’Traditionelle ufenand und bi de Chüeh machts sit jeher eifach nur „kabuum“.
72 Min, OV (F/CH-D), digital
Regie: Nicolas Steiner
So 27. September 2015 • 19:30 Uhr
Unser Garten Eden
Üse Garte Ede isch es wunderbars Porträ über d’Schrebergartesidlig Bottigemoos in Bern Bümpliz. E Welt, wo vili nume im Zug oder Auto sitzend dra verbii huschet und gar nid ahnet was i dem Mikrokosmos alles vor sich her gaht. Mano Khalil zeiget mit klare Bilder de Mikrokosmos vo de Weekend-Chiller und vo de Hobbygärtner uf. De Film deckt gegesiitigi Vorurteil uf und begriift die kulturelle Unterschied als en Teil vom multikulti Zämelebe.
97 Min, OV (CH-D), 35 mm
Regie: Mano Khalil
